Sony го прекинува производството на MiniDisc, Blu-ray и MiniDV
Sony официјално најави дека го запира производството на неколку медиуми за снимање како Blu-ray дискови, MiniDisc и MD Data дискови, но и MiniDV касети. Компанијата уште минатата година најави дека постепено ќе ја прекине изработката на овие медиуми во својата фабрика во градот Тагаџо, Јапонија, поради слаба продажба. Сега, производството целосно ќе биде прекинато следниот месец и нема да има наследни модели, се наведува на официјалната јапонска веб-страница на Sony.
Во соопштението, Sony појасни дека прекинува со производство само Blu-ray дискови на кои може да се снима, а не на оние кои се користат за дистрибуција на филмови. Според тековната понуда, компанијата има 11 вида Blu-ray дискови, со капацитет од 25GB до 128GB, во R (еднократно снимање) и RE (повторно записливи) верзии.
Иако Sony престанува со производство на Blu-ray R дискови, такви сè уште ќе бидат достапни од други производители, како Verbatim. Сепак, MiniDisc може да стане вистинска реткост, бидејќи Sony беше еден од ретките преостанати производители – па ако сте љубител на овој формат, можеби е време да набавите резерви додека уште се продаваат.
MiniDisc некогаш беше популарен за аудио-снимање, а во последниве години доживеа малку обновен интерес меѓу аудиофилите, делумно поради неговото тактилно искуство, кое недостасува кај дигиталниот стриминг. Овој формат долго време беше користен и од професионалци за снимање во живо и сè уште има место во некои студија, каде што голем дел од архивираниот материјал останал сочуван на овие дискови. (Интересен факт: во филмот The Matrix, Нео ги чува своите „сомнителни“ податоци токму на MiniDisc.)
Снимачките Blu-ray дискови и другите оптички медиуми, кои некогаш беа популарни за филмски колекции и архивирање на податоци, во голема мера беа потиснати од стриминг сервисите, евтината флеш меморија и cloud складирањето. Сите формати што Sony сега ги укинува постојат со децении – BD-RE беше лансиран во 2002 година, MiniDisc во 1992, MD Data во 1993, а MiniDV касетите, главно користени за видео-продукција, за првпат се појавија во 1995 година.
